Fyrirfram nýárskveðjur frá Rio!!!

Erum búin að hafa það alveg rosalega gott hérna í Rio de Janeiro síðastliðna 2 daga. Því miður er Tryggvi að fara frá okkur á morgun (snökt, snökt...) en við stöllurnar ásamt Suzi ætlum að halda upp á nýja árið hérna. Settum inn nokkrar "jólamyndir" frá Ilha Grande eyjunni, ekki alveg hin týpísku íslensku jól en stemningin var til staðar :) Takk fyrir allar fallegu kveðjurnar, höfum hugsað til ykkar og saknað...Þökkum fyrir allar yndislegu stundirnar á liðnu ári og hlökkum til allra þeirra frábæru sem bíða okkar á því næsta!!! Kremjuknúsar...

Gleðileg jól frá Ilha Grande

Erum búin að vera á paradísareyjunni Ilha Grande í viku og búin að hafa það rosalega gott. 30 stiga hiti, farið á ströndina á hverjum degi og erfiðasta ákvörðunin er hvað maður eigi að fá sér að borða og hvenær eigi að taka næsta blund! Búið að vera yndislegt að hafa Tryggva hérna hjá okkur, og svo í gær bættist í hópinn ensk vinkona okkar, Suzannah, sem við kynntumst í skólanum í Cuzco og verður með okkur yfir jólin og áramótin. Eyddum aðfangadegi á ströndinni Lopes Mendes og fengum þá jólagjöf á leiðinni þaðan að sjá höfrunga að leik í sjónum...ekki slæmt! Eigum eftir 4 daga hérna á eyjunni og höldum þá aftur til Rio þar sem við munum eyða áramótunum. Setjum inn myndir við fyrsta tækifæri. Okkur langar að óska ykkur öllum, kæra fjölskylda og vinir, gleðilegra jóla og vonum að þið hafið það yndislegt yfir hátíðarnar!

Sunny Rio!!!

Við stöllurnar erum loksins komnar til Brasilíu, til Rio de Janeiro. Komum hingað á föstudaginn og höldum til draumaeyjunnar Ihla Grande á morgun því Tryggvilíus er kominn :) Jei!!! Verðum s.s. á þeirri eyju í 10 daga, eða yfir jólin. Rio kom okkur skemmtilega á óvart. Ofboðslega falleg borg, mjög græn og klettafjöllin marka borgina á ótrúlega magnaðan hátt. Erum búnar að vera í himnaríki hérna þar sem okkur finnst við vera komnar í smá Vestræna menningu, þar sem við höfum fundið skyndibitakeðjur sem við könnumst við, hehe, og erum alveg búnar að vera að njóta þess! Höfum einnig verið að njóta sólarinnar og strandarinnar, en hér er um 30 stiga hiti á daginn. Erum annars komnar með brasilísk símanúmer og getum loksins haft aftur samband við umheiminn, en númerin okkar eru +5521 832 893 92 (Anna Dóra) og +5521 832 888 93 (Erla) ef þörfin grípur ykkur til að senda okkur sms :)

Salar de Uyuni

Fórum í 3ja daga jeppaferð suður eftir Bólivíu þar sem við skoðuðum náttúruperlur landsins. Á fyrsta degi sáum við hið langþráða Salar de Uyuni, eða salteyðimörk sem spannar 12.000 km² og er sú stærsta í heimi (gæti verið 9 undrið, hehehe). Þetta var áður saltvatnið Lago Minchín, sem þakti mestan hluta af suðvestur Bólivíu, en þegar það þornaði upp þá stóð eftir þessi salteyðimörk sem er alveg rosalega falleg! Komumst þarna í smá jólaskap þar sem hún minnti ansi mikið á snjó. Skoðuðum einnig Isla de los Pescadores (Fiskeyjuna) sem var alþakin risa kaktusum, alveg stórmerkilegt! Gistum þessa nótt á salthóteli, þar sem allt var búið til úr salti, m.a.s. rúmin. Annan daginn skoðuðum við nokkur lón þar sem við sáum fullt af flamengófuglum og fallegum fjallgörðum. Sáum m.a. Laguna Colorada (Litríka lónið) og Montaña Colorada (Litríka fjallið). Síðasta daginn vöknuðum við eldsnemma til að skoða hverasvæði við sólarupprás. Þar náðum við okkar methæð, eða 4950 mys! Enduðum svo ferðina með að sjá Laguna Verde (Græna lónið) og Valle de Rocas (Klettadalinn). Erum komnar aftur til La Paz, sáttar eftir frábæra ferð, og spenntar fyrir að fara til Brasilíu á morgun og að fá Tryggvann til okkar eftir 4 daga, jeiiiiii!!!

Lake Titicaca og Bólivía

Við yfirgáfum fallegu Cuzco á miðvikudagskvöldið og skelltum okkur til Lake Titicaca sem er hæsta stöðuvatn í heimi (3820 mys) og einnig það stærsta í Suður-Ameríku. Það skiptist milli tveggja landa, Perú og Bólivíu. Fórum í bátsferð til að sjá hinar mögnuðu ‘Uros’ eyjar sem eru fljótandi og eru samtals 42 talsins og eru gerðar úr e-s konar sefgrasi og eyjarbúar þurfa stöðugt að halda þeim við til að þær sökkvi ekki. Á föstudaginn vorum við svo komnar til Bólivíu, til smábæjarins Copacabana. Urðum þar vitni að vikulegri hefð sem okkur fannst soldið skondin þar sem bæjarbúar þrifu bílana og skreyttu þá fyrir utan dómkirkjuna til að þakka fyrir þá. Fórum einnig í bátsferð til eyjunnar Isla del Sol og nutum svo veðurblíðunnar í bænum á laugardaginn áður en við héldum til La Paz, höfuðborgar Bólivíu. Erum sem sagt staddar þar núna en erum enn á faraldsfæti og byrjum í nokkurra daga ævintýraferð í kvöld í rútu og jeppa til Salar de Uyuni sem er stærsta saltpanna heims. Já, alveg nóg að gera að vera ferðalangur :)

Machu Picchu

Loksins – loksins sáum við Machu Picchu!!! En við ákváðum að geyma ‘the best for last’ og sjáum ekki eftir því. Fórum um helgina til að sjá þessa mystísku borg og það er ekki hægt að lýsa með orðum hvað þetta var magnað! Machu Picchu (stundum nefnd „Týnda borgin“) er forn borg byggð fyrir komu Kolumbusar til Ameríku af Inkunum. Borgin er 2.430 metra yfir sjávarmáli á fjallsbrún yfir Urubambadalnum í Perú, um 70 km norðvestur af Cuzco. Borgin er ein af alþjóðlegu arfleiðarstöðum UNESCO. Borgin var lengi gleymd umheiminum þó íbúar svæðisins vissu af henni. Fornleifafræðingurinn Hiram Bingham uppgötvaði hana svo 1911 og skrifaði um borgina metsölubók. Við klifruðum upp á fjallið Waynapicchu til að geta virt borgina fyrir okkur úr mikilli hæð. Vonum að myndirnar gefi einhverjar hugmyndir um hvað þetta var áhrifamikil sjón. Erum ennþá að klípa okkur til að kanna hvort þetta hafi verið raunverulegt. Erum núna að njóta síðustu daganna okkar í Cuzco, en við höldum til Bólivíu á miðvikudagskvöldið. Þar til síðar...

Nazca

Um helgina fórum við að skoða hinar frægu Nazca línur en þær eru taldar vera eitt af undrum veraldar (gætu verið nr. 8 ;)....) og af mörgum taldar vera ein stærsta ráðgáta fornleifafræðinnar vegna gerðar, stærðar og fjölda þeirra. En Nazca línurnar eru svokallaðar jarðrúnir (geoglyphs) sem eru dreifðar yfir um 500 km² svæði í eyðimörkinni í Perú, rétt fyrir utan bæinn Nazca. Jarðrúnirnar mynda hinar ýmsu fígúrur, eins og apa, geimfara, kónguló o.fl. og eru taldar hafa verið gerðar af Nazca fólkinu á tímabilinu ca. 900 f.Kr. – 600 e.Kr. Ýmsar tilgátur hafa verið settar fram um gerð þessara fígúra eins og t.d. að þær hafi verið gerðar af geimverum, af trúarlegum ástæðum og jafnvel í tengslum við stjörnurnar en enginn veit með vissu um merkingu þeirra. Ekki er hægt að sjá þær í réttri mynd nema úr lofti og fórum við því í smá flugferð í 6 manna rellu yfir eyðimörkina til að virða þær fyrir okkur. Hægt er að kíkja á nokkrar myndir af þessum furðufyrirbærum í myndasafninu okkar. Jafnframt fórum við að skoða grafreit úr fornöld sem er á sömu slóðum (Cemetery of Chauchilla) og var ótrúleg sjón þar sem brot úr mannabeinum, hárlokkar, leirmunir og klæði voru um víð og dreif um svæðið og einstaka grafhýsi með múmíum sem hægt var að skoða. Núna tekur fjórða og síðasta vikan í rútínulífinu okkar við hérna í Cuzco , vinna og skóli, og svo bíðum við spenntar eftir að sjá Machu Picchu um næstu helgi! Knúsar og kremjur...

Ferðapælingar

Ferðalagið síðasta laugardag til El Valle Sagrado (The Sacred Valley) var alveg frábært og erum við alveg dolfallnar yfir snilld Inkanna! Þar sem við erum orðnar svo myndaglaðar með nýju myndavélunum þá skelltum við inn nokkrum nýjum myndum af þessum frábæra stað. Erum búnar að skipuleggja ferðalagið betur og ætlum okkur að fara næstu helgi að skoða Nazca Lines og svo helgina þar á eftir til Machu Picchu. Förum svo frá fallegu Cuzco í byrjun desember og verðum komnar til Bólivíu 8.desember. Þar ætlum við að ferðast í eina viku áður en við höldum til Brasilíu þar sem við hittum Tryggva hennar Önnu Dóru :) Hlökkum ekkert smá mikið til!!! Stefnan er sem sagt tekin á að vera á eyju rétt fyrir utan Rio de Janeiro yfir jólin og njóta jólanna á strönd í sumaryl. Eftir það förum við aftur í rútínulíf í einn mánuð, þ.e. að læra og vinna, í Córdoba í Argentínu. Svo er febrúarmánuður að mestu óákveðinn, en okkur langar til Chile, Uruguay og Paraguay…Já, nóg af ævintýrum sem bíða okkar og okkur finnst við alveg heppnastar í heimi...

Rútínan okkar

Byrjuðum á mánudaginn í sjálfboðaliðavinnunni í leikskóla í úthverfi Cuzco. Aðstæðurnar þar eru ansi bágbornar, eins og hægt er að sjá á myndunum sem við vorum að setja inn. Gott dæmi um það er að klósettaðstaða barnanna er garðurinn sem þau leika sér einnig í. Þau eru alls 24 og einn starfsmaður sem heldur utan um starfsemina. Þau eru flest á aldrinum 3-5 ára og eru alveg yndisleg, ekkert smá dugleg og nægjusöm. Þau eru í leikskólanum hálfan daginn, frá kl. 9:00-12:30, sem er okkar vinnutími. Mæðurnar skiptast á að elda hádegismatinn fyrir þau og helsta uppistaðan í matnum eru hrísgrjón. Þarna verðum við næstu tvær vikurnar samhliða spænskunáminu sem er frá kl. 14:00-18:30, þannig að við erum heldur betur komnar í rútínu :) Ætlum að fara í dagsferð um helgina á Inkaslóðir í El Valle Sagrado, hlökkum mikið til. Vonum að þið njótið helgarinnar, knúsar á línuna...

Lífið í Cuzco

Byrjuðum í skólanum síðastliðinn mánudag og okkur líst mjög vel á hann. Allir virðast leggja mikinn metnað í að læra spænskuna og skólinn býður upp á alls kyns skemmtileg námskeið. Við erum ákveðnar í að taka nokkra tíma í salsa, enda veitir ekki af að mýkja frostpinnataktana :) Ákveðið var að við myndum byrja í sjálfboðaliðavinnunni í næstu viku, á leikskóla sem er í úthverfi Cuzco og er fyrir börn sem búa við bágar félagslegar aðstæður. Við erum alltaf að komast betur og betur að því hversu margir hérna búa við bág kjör, um helming búa undir fátæktarmörkum og erfitt hefur reynst að ná tökum á atvinnuleysinu hérna og þurfa því margir að snúa sér að götusölu, skóburstun eða betla til að geta lifað. Maður getur ekki annað en hugsað með þakklæti til þess hversu lífskjör Íslendinga eru góð og maður upplifir sig heldur betur dekraðan í íbúðinni okkar (sem við ætlum að taka fljótlega myndir af) þar sem við erum með allt til alls, internet og sjónvarp o.fl. Sá munaður hefur reyndar komið sér ansi vel undanfarna daga þar sem Anna Dóra hefur mestmegnis legið í rúminu þar sem hún nældi sér í einhverja perúínska flensu en er nú komin á sýklalyf og er á góðum batavegi. Um helgina ætlum við stöllurnar síðan að taka því rólega og skoða okkur betur um hérna í Cuzco, enda svo margt að sjá og gera , og svo bíðum við spenntar eftir að byrja í sjálfboðaliðavinnunni okkar á mánudaginn. Vonum að þið eigið yndislega helgi...

Fyrstu myndir frá Cuzco

Erum búnar að setja inn fyrstu myndirnar frá Cuzco, þær eiga alveg örugglega eftir að verða mun fleiri! Endilega kíkið á myndasíðuna og sjáið fallegu borgina.
Við föttuðum það að við hefðum algjörlega klikkað á því að tala um veðrið í síðustu færslu, eins og sönnum Íslendingum sæmir. En veðrið er búið að koma okkur skemmtilega á óvart :) Hér er yfir 20 stiga hiti á daginn en kólnar þó nokkuð er kvölda tekur.
Hins vegar hafa farsímamálin ekki verið sem skyldi... Íslensku númerin okkar virka ekki hérna og við erum enn að vinna í því að fá perúísk símanúmer. Höfum ekki gefið upp alla von um að það takist.
Hafið það sem allra best :) ást & knúsar

Perú!

Fórum frá NY til Perú á þriðjudaginn og gistum í Lima eina nótt. Komum svo á miðvikudaginn til Cuzco sem verður okkar heimili næsta mánuðinn. Erum búnar að vera að koma okkur fyrir í íbúðinni á hostelinu, sem okkur list rosalega vel á og hafa allir verið mjög hjálplegir. Erum einnig búnar að skoða okkur um og kíkja í skólann okkar, sem við byrjum í á mánudaginn. Erum mjög hrifnar af þessari borg sem er 3326 m yfir sjávarmáli, sem gerir það að verkum að það tekur smá tíma að venjast loftinu. Í Cuzco búa 320.000 manns og lifir fólkið hérna mest megnis á ferðamönnum, en Cuzco er mjög nálægt Inkaborginni Machu Picchu (sem við ætlum sko að kíkja á!). Á götunum er iðandi mannlíf og víbrandi af lífi, múzík, dansi og litadýrð sem er mjög smitandi fyrir íslenska frostpinna eins og okkur :o) Við upplifum okkur frekar hávaxnar hér þar sem við trónum yfir flestum íbúunum. Einnig erum við að venjast lyktinni í borginni, en henni svipar mikið til viðvarandi sinubruna :o) Ætlum svo að fara með myndavélarnar okkar um helgina og reyna að festa allt á filmu svo þið getið fengið smá innsýn inní þessa fallegu borg og hvað við erum að upplifa. Við skrifum fljótt aftur á síðuna og endilega verið ófeimin að commenta - við elskum það!

Myndir og kort með ferðaplani

Fura tölvusnillingur með meiru aðstoðaði okkur að gera fínu heimasíðuna okkar enn fínni! Erum komnar með 'link' fyrir myndirnar okkar :) og einnig komnar með kort af Suður-Ameríku og ferðaplaninu eins og það er í dag.
Síðustu daga höfum við verið að skoða okkur um í New York - prófað hina ýmsu veitingastaði, farið í siglingu, slakað á í Central Park og verið dekraðar af Furu, besta leiðsögumanni ever!
Förum frá þessari frábæru borg á þriðjudaginn og verðum vonandi komnar til Cuzco á miðvikudaginn.
Þar til síðar. . .

London - New York

Við stöllurnar ákváðum að fara frekar óhefðbundna leið til NY og kíktum til London í eina nótt. Bara til að geta farið í dinner með Evu og James og vinkað Íslandi á leiðinni til New York daginn eftir! Erum núna komnar til NYC í frábæra íbúð Ísoldar og Steph sem er mjög miðsvæðis og stutt í allt. Ætlum að fara að halda á vit ævintýranna með henni Furu okkar næstu dagana og kaupa okkur myndavélar svo við getum farið að henda inn myndum á fínu síðuna okkar! Einnig ætlum við að setja inn ferðaplanið og kort af S-Ameríku fljótlega fyrir þá sem bíða óþreyjufullir eftir því :)
Kveðja frá borginni sem aldrei sefur . . .

Styttist í ævintýrið!

Velkomin á síðuna okkar :) Hér munum við blogga um ævintýraför okkar um Suður Ameríku sem hefst innan tíðar! Fylgist með :)
Anna Dóra og Erla